Nan echanj kout zam avèk lapolis gen 2 endividi ladan yo youn ki rele “Jonas” ki touche mòtèlman jodi vandredi 28 oktòb la nan Lilavwa 47, pa twò lwen kafou Seslès nan kad yon operasyon lapolis reyalize nan fièf yon gang ki espesyalize nan anlèvman, vòl ak zam epi kadejak.

Lapolis rekipere yon kalachnikòv ki te nan men mesye yo ki te gen avèk yo plizyè lòt endividi ame ki rive chape poul yo nan moman lapolis tap mennen entèvansyon sa.

Selon enfòmasyon fòs lòd yo dispoze, gang sa te enplike nan kidnapin 3 timoun nan Lilavois 35 pandan mwa oktòb la. Malfra yo te reklame 150 mil goud pou youn nan otaj yo ki gen sèlman 9 lane et ki te pase 6 jou nan men yo.

Jonas ki se yon manb enfliyan nan gang lan te patisipe tou nan zak kadejak sou fanm ak machann kap frekante zòn Lilavwa 47 la bonè nan maten.

Lapolis fè konnen y ap chache rès bann kriminèl sa yo epi detèmine pou kwape bandi, kap teworize popilasyon an, nan lide pou restore yon klima sekirite anndan peyi a.