Kadav Jean Dramane Simon, ansyen etidyan nan Fakilte Etnoloji ak FDSE, dekouvri lendi 9 septanm 2024 la nan Avni Kristòf, daprè imaj n ap gade sou rezo sosyal yo.

Se anfas Konsèy Nasyonal Telekominikasyon an (CONATEL), yo jwenn kadav jèn gason sa ki te disparèt depi anviwon yon jou.

Kòlèg yo ak manm fanmi l ki t ap chèche kote l ye dekouvri kò a pandan jounen lendi a. Daprè enfòmasyon jounal Ted’Actu pibliye sou paj Facebook li, fanmi yo tris anpil pou depa sa a. Gen yon sè viktim nan ki fè konnen, anplis li te yon etidyan, li t ap travay nan Ministè Kondisyon Feminin ak Dwa Fanm yo.

Enfòmasyon yo fè kwè Jean Dramane Simon te kite lakay li nan maten dimanch 8 septanm nan. Depi lè sa a, pèsonn pat janm pran nouvèl li.

Se konsa yo pral dekouvri Kadav li anviwon 24 èdtan apre, devan CONATEL. Daprè konsta yo Jean Dramane Simon mouri ak plizyè bal nan tèt li.

Toutfwa pa gen okenn endis ki revele si se anba bal lapolis ansyen etidyan leta a tonbe oubyen bal nèg ak zam yo.

N ap raple, sa fèk jou fòs lòd yo ap mennen yon gwo operasyon nan plizyè komin nan kapital la, nan lide pou trake nèg ak zam yo ki anpeche popilasyon an regle zafè li.