Se yon ijans pou Konsèy Prezidansyèl la nonnem manm KEP yo pou vrè wout tranzisyon an ka trase. Klas politik la ta dwe menm mete gwo presyon sou pouvwa an plas la pou l rantre nan chantye sa rapid pliske se eleksyon kap bay wout poun soti nan kriz la.

Dapre tout konsta sektè ki gen dwa chwazi moun pou fòme KEP a telman divize, yo riske fè tranzisyon an dire pou pi lontan. Men pi gwo danje ki pandye sou tèt pwosesis elektoral la se kèk sektè ki reprezante nan KPT a ak reprezante yo. Dwe gen vijilans wouj sou Sektè Montana a ki vle enpoze ansyen Depite Joël Louis nan non sektè Peyizan. Depi nan akò 3 avril la tout moun te dakò pou nou rantre yon pwosesis elektoral ki kredib ki pa gen fòs kote.

Popilasyon an ap tann politisyen yo sou tèren konpetisyon. Men pa dwe gen aktè politik nan KEP a ki pral panche balans la bò kote sektè pa yo. Yon ansyen depite se manm aktif yon pati politik. Se menm bagay pou yon ansyen kandida. Se sitwayen ak sitwayèn endepandan ki ka yon mennen yon pwosesis elektoral kredib. Montana pa ka vle enpoze yon politisyen kòm manm Konsèy elektoral. Men m jan tou sektè fanm nan pa ka bay yon politisyèn tankou Barbara Guillaume kòm konseye elektoral.

Gwo Joël ak Barbara Guillaume ka okipe lòt fonksyon nan pouvwa, men yo pa ka konseye elektoral paske yo chak gen pati politik pa yo. Si 2 moun sa yo ka konseye elektoral tout pati tankou Fanmi Lavalas, OPL, Pitit Desalin, RDNP, PHTK, MOPOD, UNIR, te ka gen reprezantan tou nan KEP a.